តារារាប់រយដួងដែលបានទទួលលិខិតអញ្ជើញចូលរួមកម្មវិធី “ប្រគល់ពានរង្វាន់អាណាចក្រតារា” ល្ងាចនេះ បានប្រាប់ដល់សាធារណជន ជាពិសេសបណ្ដាអ្នកគាំទ្រខ្លួនថា ពួកគេនឹងទៅដល់មហោស្រពកោះពេជ្រឲ្យបានឆាប់ជាទីបំផុត ពោលគឺតារាខ្លះបា្រប់ថា ម៉ោង៥ទៅឲ្យដល់។
ប៉ុបពី តារាសម្ដែងដែលសាធារណជនស្គាល់ថា សមបំផុតក្នុងការសំដែងជាតួអង្គភេទទីបីនោះ ថ្លែងទៅកាន់អ្នកគាំទ្រតាមរយៈSabayថា នឹងទៅដល់មហោស្រពកោះពេជ្រ ទីរៀបចំកម្មវិធី យ៉ាងហោចណាស់ម៉ោង៥ជាកំហិត។ ហេតុផលត្រង់ថា ចង់ឃើញព្រឹត្តិការណ៍ និងការរៀបចំពិធីដំបូងនេះមុនគេ ណាមួយចាប់កន្លែងអង្គុយឲ្យបានមុនគេផង។ “ម្យ៉ាងទៀតបង! ខ្លាចស្ទះចររាចរណ៍ ព្រោះមនុស្សទៅចូលរួមច្រើនណាស់ល្ងាចហ្នឹង!”។
ដូចគ្នាដែរ តារាចម្រៀងវ័យក្មេងសាច់ខ្ចី សុខ ពិសី និយាយយ៉ាងលឿនថា “បង! ខ្ញុំទៅដល់ម៉ោង៥…ទោះបីខ្ញុំជាប់សំដែងនៅខាងក្រៅក៏ដោយ ក៏ត្រូវតែទៅឲ្យលឿនដែរបង!”។ កម្មវិធីនេះ លើកកម្ពស់សិល្បៈខ្មែរ ទោះជានាងបានលើកពានឬពុំបានក៏នាងត្រូវតែចូលរួមដែរ។
សារ៉ាយ សក្ខណា តារាសម្ដែងជំនាន់ថ្មី និយាយថា កម្មវិធី “ប្រគល់ពានរង្វាន់អាណាចក្រតារា” នេះ មិនអាចរំលងបានទេ។ នាងបញ្ជាក់ទៀតថា ជាព្រឹត្តិការណ៍តារាខ្មែរលើកពានដំបូង ដូចនៅបរទេសដែរ។ នាងថា នាងសុខចិត្តវិលពីអាមេរិកឲ្យទាន់ថ្ងៃនេះដើម្បីចូលរួម។ សក្ខិណា សង្កត់ធ្ងន់ថា យ៉ាងយូរបំផុតត្រឹមម៉ោង៥និង៣០នាទីនាងនឹងទៅដល់ពិធី។
ដោយឡែក លោក គង់ សុធារិទ្ធ តារាចម្រៀងផងនិងជាមន្ត្រីមួយរូបនៅក្រសួងវប្បធម៌ផងនោះ ឲ្យដឹងថា តាមពិតទៅកម្មវិធី “ប្រគល់ពានរង្វាន់អាណាចក្រតារា” ថ្ងៃនេះ ចំថ្ងៃដែលក្រសួងវប្បធម៌ធ្វើសន្និបាត។ តែទោះជាយ៉ាងនេះក្ដី ចប់សន្និបាតភ្លាមលោកនិងក្រុមទៅកាន់កោះពេជ្រភ្លែត។ គង់ សុធារិទ្ធ បញ្ជាក់ថា ម៉ោង៦ល្ងាចនឹងទៅដល់។ “ទោះរវល់ដូចម្ដេច ក៏ត្រូវតែទៅដែរ!”។
សិល្បករសិល្បការិនីភាគច្រើន បាននិយាយថា គេនឹងទៅចូលរួម បើជារវល់ក្នុងការងារសិល្បៈយ៉ាងណាក៏ដោយ។ ដូចគ្នាដែរ លោក ទេព រិនដារ៉ូ តារាសំដែងជើងចាស់ ថ្លែងថា សិល្បករពុំគួរមើលរំលងកម្មវិធីដ៏ល្អបែបនេះទេ។
លោកថា នេះជាព្រឹត្តិការណ៍លើកស្ទួយសិល្បៈជាតិឲ្យដើរទាន់ពិភពលោក។ ចំពោះលោក បើទោះជាជាប់ថតក៏ដោយក៏មិនបោះបង់កម្មវិធីនេះចោលដែរ។ “អូន! ម៉ោង៦កន្លះបងទៅដល់…បងយឺត ព្រោះជាប់កុងត្រាថតឲ្យគេតាំងពីយូរហើយ! បន្ទាប់ពីទទួលលិខិតអញ្ជើញពីកម្មវិធី បងអត់ទទួលថតទៀតទេ”។
សិល្បករសិល្បការិនីទាំងអស់ជាទីមេត្រី! កម្មវិធី “ប្រគល់ពានរង្វាន់អាណាចក្រតារា” នឹងចាប់ផ្ដើមពីម៉ោង៥និង៣០នាទីទៅដែលផ្សាយផ្ទាល់តាមទូរទស្សន៍បាយ័នព័ត៌មាន និងតាមទូរទស្សន៍Sabayលើគេហទំព័រSabay។ សូមកុំឲ្យខកខាន និងយឺតយ៉ាវ! ណាមួយចរចរណ៍ច្បាស់ណែនតាន់តាប់ព្រោះអ្នកគាំទ្ររាប់ពាន់នាក់នឹងចូលរួមអបអរសាទរអ្នក!
0 comments:
Please add comment to express your opinion, and share it on Twitter or Facebook. Thank you in advance.